شفتي يا ستي هالسنة شو صابنا – محمد العبد حوراني

شفتي يا ستي هالسنة شو صابنا
من البرد صاروا عم يسكوا ركابنا
الخزان نشف ع غلا المازوت
وزينة ع غفلة سكرت البيوت
ومش هيك كنا ضاربين حسابنا
قولك يا ستي الحق ع نوابنا

له له يا ستي…خراس اوعى تعيدها
الدولة حرام هموم بعد نزيدها
الدولة يا ستي لو طلع في ايدها
كانت دهب بترش فوق ثرابنا
شو بدك يدقوا على ابوابنا

الدولة يا ستي عيونها بتشوف
وقلبا يا ستي عالشعب ملهوف
وزينة يا ستي عاكست الظروف
وعمرو يا ستي البرد نحنا هابنا
روح راجع التاريخ واقرا كتابنا

والله معاكي احترت يا ستي
ودوما عليي اللوم بتحطي
نامي يا ستي منيح و تغطي
ليكي الثلج صار متر فوق عتابنا
اي منيح دلدق هالسنة مزرابنا

محمد العبد حوراني

الوسوم
اظهر المزيد
زر الذهاب إلى الأعلى
إغلاق