يا رب رجعني عضيعتنا – بقلم علي عياد

يا رب رجعني عضيعتنا
تشوف إمي وشوف حارتنا
وشوف خيي وشق عالبستان
وأصلي الدبق عغصون تينتنا
وأصحى الصبح مع صحوة الرعيان
ودوري معشعش فوق طاقتنا
اشرب القهوه وصبح الجيران
وفرفك بإيدي وراق حبقتنا
وإمشي أنا ومجوز بهالوديان
نسبق النسمه وطيب وردتنا
نوعي الفجر عأعذب الألحان
ونطبع النهده بخد مرجتنا
وتحكيلنا ستي عوقت اللي كان
موسم القز عماد عيشتنا
وكيف جدي تاكلوا الاحزان
وقت اللي يسمع رقم دينتنا
وإن كان يا ربي ما في إمكان
إرجع وشوف حجار ديرتنا
بعتلي فراشه بجانحها علقان
غبرة حفافي كروم تلتنا
وإن مقبلت تبعت حجل بقيان
عجوانحو ترابات حقلتنا
إبعتلي شي نسمه تايهة بنيسان
يمكن يا ربي تكون بالصدفه
بتعرف شي نسمه من ضيعتنا

اظهر المزيد
زر الذهاب إلى الأعلى
إغلاق
إغلاق